Бүгүн, 21-февралда Улуттук илимдер академиясына Франциянын Кыргызстандагы элчиси Николя Фэй келип, УИАнын президенти Канатбек Абдрахматов менен жолугушту.

Элчи Франциянын “Иффиак” компаниясы кыргыз окумуштуулары менен иштешип жатканын, алдыда жаңы долбоорлорду биргеликте иштешүүгө кызыкдар экенин айтып, Европа окумуштуулары, анын ичинде Франция илимпоздору Кыргызстанда кайсы багытта иштешсе болооорлугун сурады.

Улуттук илимдер академиясынын президенти Канатбек Абдрахматов үч багытты сунуштады. Биринчиси – тоодо жогорку чыңалуудагы плотинаны куруу ишине Франция илимпоздорунун кеңеши керек. Анткени алар Тажикстандагы ГЭСти куруу боюнча биргеликте ийгиликтүү иштешкен. Экинчиси – Кыргызстандын климаты өтө өзгөрүлмөлүү. Бир аз өзгөрүү болсо кооптуу жагдайлар жаралышы мүмкүн. Андыктан климаттын өзгөрүшү боюнча француз илимпоздорунун тажрыйбасы керек. Үчүнчүсү – Ысык-Көлдүн суусунун абалы. Жылдан-жылга туристтердин агымы көбөйүүдө, пансионаттар көп курулуп жатат. Алар көлдүн суусуна кандай таасир берет? Бир жылда канча миллион адамды Ысык-Көл көтөрө алат? 3 же 5 млн адамбы? Ушуну илимий жактан аныктап чыгыш керек.

Николя Фэй бул сунуштарга макул экенин билдирип, Ысык-Көлдө курула турган “Үч чоку” лыжа базасы экологиялык коопсуздукту сакташы керектигин айтты. Андан сырткары, мал чарбачылыгы, жайыт, суу менен камсыздоо багытында француз компаниялары кызматташууга кызыкдар экенин билдирди.