12-октябрда КР Башкы прокуратурасында “Мыйзамдуулукту чыңдоодо, прокуратура органдарынын системасын өнүктүрүүдө жана мамлекеттик тилди өнүктүрүүдө кошкон зор салымы үчүн КР Улуттук илимдер академиясынын академиги, филология илимдеринин доктору, Ч.Айтматов атындагы Тил жана адабият институтунун директору Абдылдажан Акматалиев КР Башкы прокурорунун 2018-жылдын 1-октябрындагы №931 Буйругу менен “Өз ара аракеттенишүү жана кызматташтык” медалы менен сыйланды.

Академик сыйлыкты алып жатып, Баш прокуратура Чыңгыз Айтматовдун 90 жылдык мааракесин өткөргөн бирден бир мамлекеттик мекемелерден экендигин, улуу жазуучунун чыгармаларынын өзгөчөлүгүн, тереңдигин, бүгүнкү күндөгү улут, адамзат көйгөйүнө көз карашын, улуу “Манас” эпосунун чыгармачылыгына үндөшүүлөрүн, кыргыз маданиятынын, кино, сүрөт, театр өнөрүнүн өнүгүүсүнө жазуучунун чоң таасирин белгилеп:

–         Чыңгыз Айтматовдун чыгармаларын окуп, андан руханий байлык алып жатасыздар. Адамдар тарбияланып, калыптанып жатышат. Менин оюмча дагы көп иш-чаралар өткөрүлөт. Алардын катарында биз дагы барбыз. Биздин дагы иш-чараларыбызга катышууңуздар деп чакырабыз. Айтматовду мааракеде гана эстебестен, дайыма жадымыбызда сакташыбыз керек – деп кошумчалады.

Ошондой эле А.Акматалиев Баш прокурор Өткүрбөк Асылбекович Джамшитовго “Чыңгыз Айтматовдун 90 жылдык мааракесине арналган иш-чараларды жогорку деңгээлде уюштурууга активдүү катышкандыгы үчүн” “Айтматов академиясынын” медалын такты.

Иш-чарада режиссёр Рысбай Садыковдун Ч.Айтматовдун чыгармачылыгына арналган “Айтматовдун сабактары” аталыштагы даректүү тасма көрсөтүлүп, жазуучунун “Биринчи мугалим” чыгармасы боюнча спектакль көрсөтүлдү. Аягында чакан концерт тартууланып, келгендерге Ч.Айтматовдун чыгармачылыгына арналган фото көргөзмө да сунушталды.

Подробности 

 Автор: Press 

 Создано: October 15th, 2018 

 Просмотров : 1244