Кыргыз Республикасынын Улуттук илимдер академиясында “Кыргыз Республикасынын Улуттук илимдер академиясынын докладдары” илимий журналынын жаңы саны жарык көрдү. Илимий журналдын бул санына математика, химия, геохимия, биология, медицина, тарых, этнография, филология жана укук илимдери тармагындагы илимий изилдөөлөр жарыяланды.

Илимий журналга КР УИАнын академиги М.Мамытовдун туюп билүү маселелеринин изилдөөсүнө арналган “Илимий чыгармачылык процессиндеги баш мээнин жана туюп билүүнүн табышмактуу сырлары” аталышындагы илимий эмгеги чыккан. Макалада илимий чыгармачылык ой жүгүртүүсүндөгү туюп-билүү сезиминин механизмдеринин алгачкы сырын ачуу аракети жүргүзүлгөн. Ошондой эле туюп билүү сезими баш мээнин илимий чыгармачылык ой жүгүртүүсүндө негизги ролду аткаруусу далилденген.

КР УИАнын академиги Ш.Жоробекованын “Атразиндин гумин препараттары менен байланышы” илимий изилдөөсү, КР УИАнын академиги Б. Мурзубраимовдун, Химия жана фитотехнология институтунун окумуштуулары З.Кочкорованын, А.Шаршенбек кызынын жана Б.Калчаеванын биргелешкен “Алдын-ала термикалык иштетүүнүн каолин топурагынын кислота менен болгон ажыроосуна тийгизген таасири” иши жарык көрдү.

Андан сырткары, КР УИАнын Тарых жана маданий мурас институтунун окумуштуулары Т.Страусеванын “Кыргызстанды согуштан кийинки мезгилде өнүктүрүүнүн коомдук-саясий жана маданий-агартуу процесстери” жана Т.Арзыбаевдин “Кыргыз-калмак этносаясий байланыштары” макалалары жарыяланды. Ошондой эле илимий журналга укук тармагынан К.Бөкөнбаевдин “Кыргыз Республикасынын азыркы коомдук саясий абалынын контекстиндеги конвергенциясы менен дивергенциясы” эмгеги чыкты.

Подробности 

 Автор: admin 

 Создано: March 14th, 2018 

 Просмотров : 2382