Улуттук илимдер академиясынын жалпы жамааты 2010-жылдын 7-апрелиндеги элдик революцияда курман болгондорду эскерип, алардын Ала-Тоо аянтындагы монумент эстелигине гүл койду. Шейит кеткендерге арналып куран да окулду.

Тарых жана маданий мурастар институтунун директору, УИАнын корреспондент-мүчөсү, профессор Аблабек Асанканов элдик революция күнү жөнүндөгү оюн айтып жатып, төмөндөгүлөргө токтолду:

«Бул революциянын Кыргызстан үчүн мааниси абдан зор. Ал кезде өлкөнү К.Бакиев башкарып, авторитардык бийлик орноштурган эле. Мамлекет бүгүнкү күнү парламенттик-президенттик башкарууга өттү. Эң негизгиси криминалдашкан, коррупцияланышкан үй-бүлөлүк башкаруу жоюлуп, өлкөдө демократиялык башкарууну орнотууга жол салынды».

Мындан 7 жыл мурун коомчулуктун калың катмары ошол кездеги президент Курманбек Бакиевдин бийлигине нааразычылыгын билдирип митингге чыккан. Мыйзамдуулук жана саясий туруктуулукту орнотуу үчүн митингге чыккандардын арасынан 87 адам мерт кеткени маалым. Кыргызстандын эли үчүн бул тарыхый окуя маанилүү дата катары белгиленип, Жогорку Кеңеш 2010-жылдын 7-апрелин «Элдик Апрель революциясы күнүн» жыл сайын белгиленүүчү жумуш эмес күн катары белгилөө жөнүндө мыйзам кабыл алган.

Подробности 

 Автор: admin 

 Создано: April 7th, 2017 

 Просмотров : 2933