Версия для слабовидящих
Кыргыз Улуттук илимдер академиясынын Тарых жана маданий мурастар институтунун директору Абылабек Асанканов Ирандын Мешхед шаарындагы “Астане де-Резави” көп тармактуу ишканасынын аналитика бөлүмүнүн жетекчисинин орун басары Мехди Жалали менен жолукту.
Жолугушууда тарых илими, аны изилдөөнүн методдору, Борбор Азия аймагынын тарыхы, цивилизациясы, улуттар жана этностор аралык жалпылыкты изилдөөгө байланышкан суроолор жана маселелер талкууга алынды.
А.Асанканов М.Жалалиге институттун структурасы, изилдөө тармактары, методикалары, колдонгон маалымат булактары жөнүндө айтып берди. Ошондой эле ал Борбор Азия цивилизациясынын өнүгүү потенциалы жогору экендигин айтып, аны менен катар эле анда коммуникациялык, маданий айырмачылыктар басымдуулук кылаарын белгилей кетти.
“Борбор Азия мамлекеттерин бири-бирине жакындатууда экономикалык-саясий фактор чоң роль ойнойт. Бул чөлкөм мурун “уйкудагы арстан” болсо, азыр ал ойгонууда жана өнүгүүдөгү потенциалы өтө жогору экендигин көрсөтүүдө” – деди.
М.Жалали тарых илимин изилдөө жаатындагы кызматташууну улантуу үчүн А.Асанкановду Мешхед шаарында өтө турган “Ислам цивилизациясын” изилдөөгө багытталган форумга чакырды.
- Подробности
- Автор: admin
- Просмотров : 1068