Кыргыз Республикасынын Улуттук илимдер академиясында “Ааламдашуу шартында улуттук иденттүүлүктү сактоодогу салттуу музыкалык искусствонун ролу” аталышындагы эки күнгө созулган Эл аралык илимий-практикалык конференция өттү. Иш-чарада салттуу музыкалык искусствону изилдөө жана маданият, искусство жана дүйнө тааным маселелерине байланышкан пленардык жана секциялык отурумдар болду.

Салттуу музыка күнүнө карата жана Ч.Айтматовдун 90 жылдыгына арналган илимий-практикалык конференцияга окумуштуулар, искусство таануучулар, коомдук ишмерлер, коңшу мамлекеттерден келген өнөр адамдары менен музыка тармагын изилдөөчүлөр катышты.

КР УИАнын президенти, академик Мурат Жуматаев конференциянын катышуучуларына ийгилик каалап: “Искусство тармагындагы жаш кадрларды өстүрүү маселеси жолго коюлуп, кандидаттык, докторлук, диссертацияларды коргоого шарт түзүлгөнү алдыга карай илгерилөөнүн негизги белгиси болуп саналат. Ал эми жаш муунду элдик музыкалык маданиятты сактоого үндөө жана профессионалдык музыкалык маданиятты өнүктүрүү максатында өткөрүлүп жаткан бул иш-чара өзгөчө окуя катары кабыл алынышы керек”, – деди.

КР УИАнын Философия жана саясий-укуктук изилдөө институтунун кызматкери, философия илимдеринин доктору Калбүбү Сариева конференциянын мааниси тууралуу айтып жатып: “Салттуу музыкага байланыштуу өтүп жаткан иш-чара өнөр адамдары үчүн абдан пайдалуу болушу мүмкүн. Ал эми ошол искусство тармагын изилдегендер үчүн пайдасы андан дагы артууда. Анткени, муну менен изилдей турган маселелерге байланышкан көптөгөн, ар тараптуу жолдор ачылып жатат”, – деген оюн кошумчалады.

Иш-чараны КР УИАнын Философия жана саясий-укуктук изилдөө институту, КРнын Маданият, маалымат жана туризм министрлиги жана “Кыргыздын салттуу музыкасы” фонду уюштурду.

Подробности 

 Автор: admin 

 Создано: April 24th, 2018 

 Просмотров : 1921