Версия для слабовидящих
5-июнда Кыргыз Республикасынын Улуттук илимдер академиясында “Заманбап илим: проблемалар жана перспективалар” деген аталыштагы илимий-практикалык конференция болуп өттү.
Иш-чара илимдин өнүгүүсүндөгү бүгүнкү проблемаларды, инновациялык ишмердиктин активдешүүсүн, Кыргыз Республикасынын өнүгүүсүндө Ата мекендик илимдин жаңылануунун жана өнүгүүсүнүн маанилүү факторуна айлануусун камтып, катышуучулар өлкөнүн интеллектуалдык, социалдык-экономикалык потенциалы, улуттук коопсуздукту камсыздоо туурасындагы талкууларга катышышты. Ошондой эле конференция заманбап Кыргызстандагы илим жаатына тийиштүү проблемаларды чечүүгө арналып, ал кырдаалдан чыгуунун жолдору каралды.
Конференцияда КР УИАнын президенти, академик Мурат Жуматаев өлкөдөгү илим тармагы ушул кезге чейин коомдогу ордун таба албай келе жаткандыгын белгилеп: “Мамлекеттик жогорку илимий мекеме болгонуна байланыштуу бизде көптөгөн конференциялар, кереге кеңеш, симпозиум сыяктуу иш-чаралар өтүп келет. Бирок, алар кайсы бир тармактар гана боюнча болуп жалпы проблемаларга арналбай жатат. Андыктан аларга комплекстүү түрдө мамиле жана чечкиндүү кадамдарды жасоонун убактысы келди. Анткени, алар мамлекеттин улуттук коопсуздугуна да жооп берүүчү тармак болуп саналат. Улуттук-маданий баалуулуктар үчүн гуманитардык илимдер, экономика тармагы үчүн так илимдер, айыл-чарба техника илимдери, калктын саламаттыгы үчүн медицина-биология, экология илимдери жооп берет. Ошондуктан, буга байланыштуу илим жаатындагы чечилбей жаткан маселелер маанилүү тапшырма катары каралышы шарт”, – деди.
Илимий-практикалык конференцияга өлкөнүн окумуштуулары, ЖОЖдун окутуучулары, коомдук ишмерлер, илимий мекемелердин өкүлдөрү катышты.
- Подробности
- Автор: admin
- Просмотров : 1491