Версия для слабовидящих
21-июнда Бишкектеги Ала-Арча көрүстөнүндө КР УИАнын академиги Какин Сулайманкуловду эскерүү зыйнаты өттү. Иш-чаранын алкагында академиктин эстелигинин ачылышы болуп, “Какин Сулайманкулов: “Илимде оңой жол жок” аттуу китеп да жазылгандыгы, бул китеп белгилүү окумуштуунун өмүр жолуна, талыкпаган эмгегине арналгандыгы жөнүндө сөз болду.
КР УИАнын президенти, академик М.С.Жуматаев Какин Сулайманкуловдун адамдык касиети, илимге берилген мээнеткечтиги жөнүндө айтып келип, буларга токтоду:
– Убакыт өтсө да улуу кишинин орду толгустугу, чоң жоготуу болгондугу билинип турат эмеспи. Какин Сулайманкуловичти жоготуу илим үчүн чоң жоготуу болду. Ал улуу окумуштуу, педагог, коомдук ишмер, жакшы ата, инсан эле. Какин агай 600дөн ашык илимий эмгектин автору, бир нече патенттин ээси, дагы баса белгилей турган нерсе – ал дайыма изденген окумуштуу болчу. Өмүрүнүн аягында да өндүрүшкө киргизе турган идеялар менен алпурушканы жаткан. Окумуштуунун эстелиги – анын идеялары жазган эмгектери кийинки муундагы окумуштуулардын эмгектеринде, өзү эмгектенген институтта эмгектин уланышы.
IMG 1965Академик Какин Сулайманкуловдун шакирти, академик Бектемир Мурзубраимов устаты жөнүндө төмөнкүлөргө токтолду:
– Какин агайдын шакирттери КМШ чөлкөмү боюнча жайылып, үзүрлүү эмгектенип жатышат. Мен дагы илимий эмгегимди жактаганда устатымдын тазалыгын, эмгекчилдигин көрүп үлгү туттум. Какин агайды билгендер, шакирттери анын ишин улайт, эстеп жүрөт деп ишенемин.
Эскерүү зыйнатына Улуттук илимдер академиясынын жана окуу жайлардын окумуштуулары, бийликтин өкүлдөрү катышты.
- Подробности
- Автор: admin
- Просмотров : 1848