Версия для слабовидящих
2019-жылдын 15-октябрында Кыргыз Республикасынын Улуттук илимдер академиясында белгилүү тарыхый ишмер Байтик Канай уулунун 200 жылдыгына арналган “Байтик баатыр Канай уулу: жашаган доору, ишмердүүлүгү, тарыхта ээлеген орду” аттуу илимий-тажрыйбалык конференция өттү.
Иш-чара КР УИАнын Б.Жамгерчинов атындагы Тарых, этнология жана археология институту, КР Президентинин Аппаратына караштуу Кыргызстан элдеринин тарыхый жана маданий мурастарынын “Мурас” фонду жана КРнын Өкмөтүнүн Чүй облусундагы ыйгарым укуктуу өкүлчүлүгү тарабынан уюштурулду.
Конференцияда КР УИАнын президенти, академик М.С. Джуматаев, КР Президентинин Аппаратынын жетекчисинин биринчи орун басары А.М. Кененбаев, КР Жогорку Кенешинин төрагасынын орун басары М.И. Бакиров, КРнын Өкмөтүнүн Аппаратынын билим берүү, маданият жана спорт бөлүмүнүн башчысы Ж.У. Саралаева, КР Өкмөтүнүн Чүй облусундагы ыйгарым укуктуу өкүлү А.А. Намазалиев, Россия Федерациясынын Кыргыз Республикасындагы элчиси Н.Н. Удовченко, КР Президентинин Аппаратына караштуу Кыргызстан элдеринин тарыхый жана маданий мурастарынын “Мурас” фондунун башчысы К.С. Молдокасымов катышып, куттуктоо сөздөрүн сүйлөштү, ошондой эле иш-чарага коомдук жана мамлекеттик уюмдардын өкүлдөрү, илимпоздор жана маданият ишмерлери катышышты.
КР Президентинин Аппаратынын жетекчисинин биринчи орун басары А.М. Кененбаев өз сөзүндө “Байтик баатыр XIX кылымдын аягындагы атактуу инсандардын бири. Белгилүү тарыхый ишмерибиз өз алдынча жана бирдиктүү мамлекетти түптөөгө көптөгөн аракеттерди жасаган. Байтик баатырдын ишмердиги, өрнөктүү өмүр таржымалы кыргыздын кылым карыткан тарых барактарында өзгөчө орунду ээлери талашсыз” – деп айтта кетти.
КР Жогорку Кенешинин төрагасынын орун басары М.И. Бакиров:
“Кыргыз эли кылымдарды карыткан, эч ким аны өчүрө албайт тарыхтан” демекчи, эки кылым мурда кыргыз элинин, кыргыз мамлекеттүүлүгүнүн келечегине эбегейсиз зор салымын кошкон Байтик баатырдын басып өткөн жолун тарыхчылар менен бирге эскерип отурабыз. Байтик баатыр даанышмандыгы, көрөгөчтүгү менен кыргыздын келечегине чыйыр жол салып кеткенин эч ким тарыхтан өчүрө албайт” – деп кошумчалады өз сөзүндө.
КР УИАнын президенти, академик М.С. Джуматаев: “Байтик Канай уулунун 200 жылдыгына арналган алгачкы иш-чара Улуттук илимдер академиясында өтүп жаткандыгы биз үчүн абдан маанилүү. Кыргыз мамлекеттүүлүгүнө Байтик баатырдын кошкон салымы өтө чоң. Байтик баатыр элди уюштурган, жетектеген саясий лидер болгон. Ал бардык маселелерди туура чече алган, көрөгөч, даанышман инсан болгон” – деп белгиледи.
Ошондой эле илимий-тажрыйбалык конференцияда Байтик баатырдын өмүрү жана ишмердиги, орус админстрациясы менен болгон мамилелери, кыргыз тарых наамасында изилдениши жана баатырдын портретинин эл оозунда чагылдырылышы тууралуу баяндамалар окулуп, талкууланды.
- Подробности
- Автор: Press
- Просмотров : 2043