2019-жылдын 28-ноябрында Кыргыз Республикасынын Улуттук илимдер академиясында залкар окумуштуу-чыгыш таануучу, академик В.В. Бартольддун 150 жылдыгына карата, КР УИАнын Б. Джамгерчинов атындагы Тарых, археология жана этнология институту тарабынан уюштурулган илимий-практикалык конференция өттү.

Илимий-практикалык конференцияга окумуштуулар, билим берүү жана илимий мекемелердин өкүлдөрү, КР УИАнын илимий кызматкерлери катышты.

В.В. Бартольд 1869-жылы 3 (15) ноябрында Санкт-Петербург шаарында орусташкан немис үй-бүлөдө туулган. 1887-жылы В.В. Бартольд  классикалык гимназияны алтын медаль менен аяктап Санкт-Петербург университетинин араб-перс-түрк-татар  бөлүмүнө тапшырган. Өзүнүн илимий ишмердигинин  башталышынан тартып Борбордук Азиянын орто кылымдар тарыхына өзгөчө көңүл бөлгөн.

1900-жылы Бартольд магистрдик диссертациясын түп нуска булактар менен Түркстан тарыхы боюнча жогорку деңгээлде жактагандыгы үчүн докторлук даражасына ээ болгон.1910-жылы Бартольд Императорлук Санкт-Петербург илимдер академиясына член-корреспондент,1913-жылы академик болуп шайланган.

Бартольд бир канча илимий уюмдарда илимий ишмердик менен алектенген.1898-жылдан тартып географиялык, 1900-жылдан Орус археологиялык, 1911-жылдан  табигый илимдер сүйүүчүлөр коомуна, 1916-жылдан Тавр илимий комиссиясына мүчө болгон.

Изилдөөчүлүктөгү биринчи кадамынан тартып ал түрк элдеринин, анын ичинде кыргыздардын тарыхына өзгөчө кызыккан. “Байыркы түрк жазууларынын тарыхый мааниси”, “Жети-Суунун тарыхынын очерки” эмгектеринде кыргыз элинин тарыхы тууралуу баалуу маалыматтар кезигет. Кыргыздар тууралуу маалыматтарды чогултуп, системалаштырып, 1927-жылы “Кыргыздар” аттуу эмгегин жарыялаган. Бул очеркте кыргыздардын байыркы доордон ХIХ кылымга чейинки тарыхы баяндалат.

Подробности 

 Автор: Press 

 Создано: November 29th, 2019 

 Просмотров : 2072